លោក លី គួង មេក្លោង Online Scams តុលាការ ចេញដីកាឃុំខ្លួន
ចៅក្រមស៊ើបសួរនៃសាលាដំបូងរាជធានីភ្នំពេញ នៅថ្ងៃទី១៥ មករា បានសម្រេចចេញដីកាឃុំខ្លួនលោក លី គួង ដែលជាអ្នកជំនួញដ៏ធំមួយរូបនៅកម្ពុជា ជាពិសេសនៅខេត្តព្រះសីហនុ ពាក់ព័ន្ធឧក្រិដ្ឋកម្ម Online Scam។ការសម្រេចចោទប្រកាន់នេះ ធ្វើឡើងក្រោយពីតុលាការកម្ពុជាបើកការស្រាវជ្រាវតាំងពីឆ្នាំ២០១៩មក។
យោងតាមដីកាបង្គាប់ឱ្យឃុំខ្លួន លោក លី គួង ត្រូវបានតុលាការកម្ពុជាសម្រេចចោទប្រកានជាច្រើនបទល្មើសដូចជាការរកស៊ីមិនស្របច្បាប់សម្រាប់កេងប្រវ័ញ្ច បទឆបោកមានស្ថានទម្ងន់ទោស ជាក្រុមមានការចាត់តាំង និង បទសម្អាតប្រាក់ ដែលបានប្រព្រឹត្តនៅក្នុងប្រទេសកម្ពុជា និង ទីកន្លែងផ្សេងទៀត ចាប់តាំងពីឆ្នាំ២០១៩ រហូតមកដល់បច្ចុប្បន្ន។
ក្រោយការចោទប្រកាន់ លោក លី គួង ត្រូវបានបញ្ជូនទៅកាន់មណ្ឌលអប់រំកែប្រែ ដើម្បីអនុវត្តតាមដីកាសម្រេចរបស់ចៅក្រមស៊ើបសួរ។សំណុំរឿងនេះ កំពុងស្ថិតក្នុងដំណាក់កាលស៊ើបសួរយ៉ាងយកចិត្តទុកដាក់បន្ថែមទៀត ដើម្បីស្វែងរកអ្នកពាក់ព័ន្ធផ្សេងទៀតមកផ្តន្ទាទោសតាមច្បាប់។
គួរបញ្ជាក់ថា លោក លី គួង ធ្លាប់ត្រូវបានបណ្តាញព័ត៌មាន BBC របស់អង់គ្លេសបានផ្សព្វផ្សាយការស៊ើបអង្កេតរបស់ខ្លួនមួយ ដោយលើកឈ្មោះ លោក លី គួង ជាម្ចាស់ទីតាំងមួយកន្លែងឈ្មោះ ហ័ងឡឺ (Huang Le) ក្នុងខេត្តព្រះសីហនុ ដែលត្រូវបានប្រើប្រាស់ជាទីតាំងនៃការជួញដូរមនុស្ស បង្ខាំងមនុស្ស និងបង្ខំមនុស្សឱ្យធ្វើការ ដើម្បីបោកបញ្ឆោតប្រាក់របស់គេ។តែកាលណោះលោក លី គួង ចេញមុខច្រានចោល៕ (សូមតាមដានភាគ២បន្ត)
