(ខេត្តបាត់ដំបង)៖ ឯកឧត្តម រស់ ថាន់សន រដ្ឋលេខាធិការក្រសួងព័ត៌មាន បានអញ្ជើញជាអធិបតីក្នុងសិក្ខាសាលាផ្សព្វផ្សាយស្តីពីវឌ្ឍនភាពការងារកំណែទម្រង់វិមជ្ឈការ និងវិសហមជ្ឈការក្រសួងព័ត៌មាន ព្រមទាំងពិនិត្យឡើងវិញនូវការអនុវត្តមុខងារដែលបានប្រតិភូកម្មទៅមន្ទីរព័ត៌មានរាជធានី-ខេត្ត និងរដ្ឋបាលថ្នាក់ក្រោមជាតិ ដែលប្រព្រឹត្តទៅរយៈពេលពីរថ្ងៃ គឺថ្ងៃទី២២ និងថ្ងៃទី២៣ ខែតុលា ឆ្នាំ២០២៦ នៅខេត្តបាត់ដំបង។
សិក្ខាសាលានេះមានគោលបំណងពិនិត្យ និងវាយតម្លៃវឌ្ឍនភាពនៃការអនុវត្តមុខងារដែលក្រសួងព័ត៌មានបានប្រតិភូកម្ម ព្រមទាំងប្រមូលបញ្ហាប្រឈម និងសំណូមពរពីមន្ត្រីជំនាញ ដើម្បីស្វែងរកដំណោះស្រាយសមស្រប និងកំណត់ទិសដៅការងារបន្តឱ្យកាន់តែមានប្រសិទ្ធភាព។
ក្នុងឱកាសនោះ អង្គសិក្ខាសាលាបានស្តាប់បទបង្ហាញពីមន្ត្រីជំនាញពាក់ព័ន្ធនឹងវឌ្ឍនភាពកំណែទម្រង់វិមជ្ឈការ និងវិសហមជ្ឈការ គោលការណ៍ និងនីតិវិធីនៃការអនុវត្តមុខងារដែលបានប្រតិភូកម្ម ព្រមទាំងមូលដ្ឋានច្បាប់ និងលិខិតបទដ្ឋានគតិយុត្តពាក់ព័ន្ធ។
ជាមួយគ្នានេះដែរ ថ្នាក់ដឹកនាំ និងមន្ត្រីមន្ទីរព័ត៌មានរាជធានី-ខេត្ត ក៏បានចូលរួមពិភាក្សា ផ្លាស់ប្តូរបទពិសោធន៍ និងលើកឡើងពីបញ្ហាប្រឈមក្នុងការអនុវត្តការងារជាក់ស្តែង ដើម្បីរួមគ្នាពង្រឹងការយល់ដឹង និងកែលម្អការអនុវត្តមុខងារឱ្យបានត្រឹមត្រូវ ស្របតាមតួនាទី និងភារកិច្ចដែលបានកំណត់។
សិក្ខាសាលានេះ គឺជាវេទិកាដ៏សំខាន់ក្នុងការពង្រឹងសមត្ថភាពមន្ត្រីជំនាញ លើកកម្ពស់ការសម្របសម្រួល និងពង្រឹងកិច្ចសហការរវាងក្រសួងព័ត៌មាន មន្ទីរព័ត៌មានរាជធានី-ខេត្ត និងរដ្ឋបាលថ្នាក់ក្រោមជាតិ ដើម្បីធានាថាការអនុវត្តកំណែទម្រង់វិមជ្ឈការ និងវិសហមជ្ឈការ ប្រព្រឹត្តទៅដោយរលូន ស៊ីសង្វាក់គ្នា និងមានប្រសិទ្ធភាពខ្ពស់ ស្របតាមគោលការណ៍ច្បាប់ និងឆ្លើយតបនឹងតម្រូវការការងារព័ត៌មាននៅថ្នាក់ក្រោមជាតិ។