(កំពង់ធំ)÷ ថ្ងៃសុក្រ១១រោច ខែកត្តិក ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី០៨ ខែធ្នូ ឆ្នាំ២០២៣ ខណ្ឌរដ្ឋបាលជលផលមានសកម្មភាពការងារគឺ លោក ចាយ គង់ម៉េង នាយរងខណ្ឌរដ្ឋបាលជលផលកំពង់ធំ បានដឹកនាំក្រុមការងារចម្រុះប្រចាំការនៅឃុំពាមបាង សហការណ៍ជាមួយក្រុមការងារចម្រុះថ្នាក់ជាតិ ចុះប្រតិបត្តិការ និងត្រួតបង្ក្រាបបទល្មើសជលផលនៅចំណុច: អន្លង់សៅ និងព្រែកខ្វែងសណ្តាន់ ឃុំពាមបាង ស្រុកស្ទោង ខេត្តកំពង់ធំ។
      លោក ចាយ គង់ម៉េង នាយរងខណ្ឌរដ្ឋបាលជលផលកំពង់ធំ បានដឹកនាំក្រុមជំនាញ បន្តចុះប្រតិបត្តិការ និងបង្ក្រាបបទល្មើសនេសាទបឹងទន្លេសាបក្នុងនោះលទ្ធផលអនុវត្តបាន០១ករណី បានចុះរុះរើបំផ្លាញចោលវត្ថុតាងនៅនឹងកន្លែងរួមមាន÷ របាំងសាច់អ៊ួនចំនួន០៥របាំង ប្រវែង១.៤៥០ ម៉ែត្រ ឡុកចំនូន១០គ្រឿង លប/លូចំនួន២០មាត់ បង្គោលចំនួន១៥០០ដើម និងចាក់ប្រលែងត្រីចម្រុះចូលបឹងធម្មជាតិ ទម្ងន់៣០ គីឡូក្រាមផងដែរ។
         លោក ចាយ គង់ម៉េង បានលើកឡើងថា ដោយសង្កេតឃើញបងប្អូនប្រជានេសាទ នៅឃុំពាមបាង ស្រុកស្ទោងនៅរដូវទឹកសម្រកនេះបានមកដល់ ប្រជានេសាទកំពុងតែនេសាទជាលក្ខណៈទ្រង់ទ្រាយធំធ្វើឱ្យប៉ះពាល់ដល់មច្ឆាជាតិ។ អាស្រ័យហេតុនេះហើយ ក្រុមជំនាញក៏បានចុះបង្ក្រាបន្ទប់ស្កាត់បទល្មើសនេសាទ និងផ្សព្វផ្សាយពីគោលការណ៍មួយចំនួនដល់ប្រជានេសាទឱ្យគាត់មានការប្រុងប្រយ័ត្ន និងមានការទទួលខុសត្រូវចំពោះឧបករណ៍របស់ខ្លួន ប្រសិនបើមានបញ្ហាអ្វីមួយកើតឡើងនៅក្នុងសហគមន៍របស់ពួកគាត់សូមរាយការណ៍មកកម្លាំងជំនាញ ដើម្បីជួយទប់ស្កាត់ និងបង្ក្រាបជាបន្ទាន់៕