(ខេត្តកំពង់ឆ្នាំង)÷ ព្រះពុទ្ធ និងបរិសទ័្ទព្រមប្រជារាស្រ្តកំពុងតែដង្ហោហៅ និងរអ៊ូរទាំ ចំពោះទីវត្តអារាមមួយកន្លែងដែលមានសភាពធ្លុះធ្លាយស្ទើរតែទាំងស្រុងដោយមិនមាន សប្បុរសជន ឬស្ថាប័នពាក់ព័ន្ធ ជាពិសេសក្រសួង មន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង មិនអើបពើរ និងមើលមិនឃើញពីកង្វះខាតចំពោះទីវត្តអារាមមួយនេះបន្តិចសោះឡើយ។
   ប្រជាពលរដ្ឋដែលស្ថិតនៅក្បែរៗនោះបានបង្ហើបនូវអារម្មណ៍ ស្រគត់ស្រគុំ និងខ្សឹបខ្សៀវឲ្យដឹងបន្តដែរថា: វត្តដែលទ្រុឌទ្រោមដំបូលធ្លុះធ្លាយមើលឃើញមេឃ ឃើញផ្កាយមួយនេះពិតជាកំសត់កម្រខ្លាំងណាស់ ពិសេសរៀងរាល់រដូវបុណ្យទានផ្សេងៗ គឺពួកគាត់មិនដែលហ៊ានចូលក្នុងព្រះវិហារនោះឡើយ ព្រោះដោយមើលឃើញសភាពព្រះវិហារមួយនេះពិតជាទទ្រោម ហើយខ្លាចបាក់ស្រុតសង្កត់លើពួកគាត់ផងដែរ។
   ម្យ៉ាងទៀតសោត រាងរាល់រដូវបុណ្យទានម្ដងៗគឺពួកគាត់តែងតែនាំគ្នាក្រាលកន្ទេល ដើម្បីជួបជុំនិងប្រារព្ធកម្មវិធីបុណ្យ ជារៀងរាល់ពេល។ពួកគាត់បានបន្តឲ្យដឹងផងដែរថា: ដោយឃើញវត្តអារាមផ្សេងៗដទៃមួយចំនួនទៀត មានសោភ័ណ្ឌភាពស្អាត គួរឲ្យបិតិសោមនស្ស ចំណែកឯវត្តអារាមមួយនេះវិញ ព្រះវិហារចាស់ទ្រុឌទ្រោមដំបូលធ្លុះធ្លាយ មើលឃើញផ្កាយមើលឃើញមេឃ បែបនេះហើយពួកគាត់ក៏បាន មូលមតិជាឯកច្ឆ័ន្ទ ស្នើសុំឯកសារដើម្បីជួសជុលដំបូលព្រះវិហារមកជាយូរមកហើយរហូតមកដល់ពេលនេះ រយៈពេលជិតប្រហែល 4 ឆ្នាំហើយមិនបានសម្រេច ដោយសារមន្ទីរធម្មការ និងសាសនាខេត្តកំពង់ឆ្នាំង រួមនឹងមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង មិនអើបពើរ នឹងមិនខ្វល់ខ្វាយ ពុំមិនយកចិត្តទុកដាក់បន្តិចសោះឡើយ។
   ប្រជាពលរដ្ឋទទូចស្នើរសុំឲ្យ ឯកឧត្តម ស៊ុន សុវណ្ណារិទ្ធ អភិបាល នៃគណៈអភិបាលខេត្តកំពង់ឆ្នាំង មេត្តាជួយអន្តរាគមន៍និងពន្លឿនបន្ថែមចំពោះឯកសារដែលបានស្នើសុំជួសជុលដំបូលព្រះវិហារ ពីសំណាក់មន្ទីរធម្មការ និងសាសនា រួមនឹងមន្ទីរវប្បធម៌ និងវិចិត្រសិល្បៈក្នុងកិច្ចអន្តរាគមន៍ខាងលើនោះផងដែរ។ព្រោះពួកគាត់នៅតែទទូចឡើងដ៏ដែលៗផងដែរថា: ឲ្យតែកម្មវិធីបុណ្យទានម្ដងៗក្រាលតែកន្ទេលនៅក្រៅព្រះវិហាររហូត ដល់ពេលភ្លៀងម្ដងៗរត់ចែកជើងគ្នារជ្រករាងៗខ្លួន។
   មិនតែប៉ុណ្ណោះប្រជាពលរដ្ឋនៅតែមានក្តីកង្វល់យ៉ាងខ្លាំងផងដែរថា: ហេតុអ្វីបានជាមន្ទីរធម្មការ និងសាសនា រួមនឹង មន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង មិនអើបពើរចំពោះលិខិតស្នើសុំឯកសារជួសជុលដំបូលព្រះវិហារខាងលើនេះដែលមានឈ្មោះថាវត្ត (សេរីតេជ:) ដែលមានទីតាំងស្ថិតនៅក្នុង ភូមិប្របជ្ជ: ឃុំច្រេស ស្រុកកំពង់ត្រឡាច ខេត្តកំពង់ឆ្នាំង៕

                        ដោយ សហការី VOJ