ល្បីកក្រើកបណ្តាញសង្គមហ្វេសប៊ុកហើយ លោក គឹម សារិទ្ធ នាយរងអធិការដ្ឋានរដ្ឋបាលជលផលចតុមុខ បានស្ពាយ កាំភ្លើងអាកាបត់ យកទៅបាញ់ទូកប្រជានេសាទ ព្រោះតែខឹងពលរដ្ឋតវ៉ា មិនបង់លុយឲ្យខ្លួន១.០០០ដុល្លា ទើបបានជា ហេតុការណ៌នេះ កើតឡើងបែបនឹង ។

តាមប្រភពពីពលរដ្ឋបានឲ្យដឹងថា ព្រោះតែពលរដ្ឋមានការឈឺចាប់ទ្រាំមិនបាន នឹងទង្វើរបស់លោក គឹម សារិទ្ធ នាយរង អធិការដ្ឋានរដ្ឋបាលជលផលចតុមុខទទួលបន្ទុកបង្រ្កាបបទល្មើសនេសាទខេត្តតាកែវ ទើបប្រភពទម្លាយព័ត៌មានរួម និង វីឌីអូរឃ្លឹបនេះ ដើម្បីបង្ហាញឲ្យប្រមុខថ្នាក់ដឹកនាំ បានមើលឃើញអំពីទង្វើដ៏ល្អរបស់មន្ត្រីខ្លួន ធ្វើយ៉ាងណាចំពោះរាស្ត្រ ។

តាមរូបភាពបានបង្ហាញយ៉ាងច្បាស់ថា លោក គឹម សារិទ្ធ ដែលមានឋានៈតួនាទីជា នាយរងអធិដ្ឋានរដ្ឋបាលជលផលចតុ មុខ បានយកកាំភ្លើងអាការស្វ័យបត់ បាញ់ទូកនេសាទរបស់ប្រជាពលរដ្ឋ ព្រោះខឹងទារលុយមិនបានចំនួន១ពាន់ដុល្លារ ជាថ្នូរនឹងការដោះលែងទូកនេសាទខុសច្បាប់ ។

ការបាញ់ដ៏គឃ្លើនរបស់លោក គឹម សារិទ្ធ នេះ បានកើតឡើងកាលពីថ្ងៃទី២៧ ខែតុលា ឆ្នាំ២០១៩ ស្ថិតនៅចំណុចស្នាក់ ការរដ្ឋបាលជលផលកំពង់អំពិល ស្រុកបុរីជលសារ ខេត្តតាកែវ ។

ប្រជាពលរដ្ឋសុំមិនបញ្ចេញឈ្មោះ បានប្រាប់ឲ្យដឹងថា លោក គឹម សារិទ្ធ កំពុងធ្វើបាបពលរដ្ឋខ្មែរនៅស្រុកបុរីជលសារ និង ស្រុកអង្គរបុរី ខេត្តតាកែវ ឲ្យរងទឹកភ្នែកនិងការឈឺចាប់ជាខ្លាំងណាស់ ខណៈពេលដែលពួកគាត់ចេញធ្វើនេសាទត្រី ជា លក្ខណៈគ្រួសារម្តងៗ ។ នៅពេលចេញនេសាទត្រីម្តងៗ ក្នុងនាមជាលក្ខណៈគ្រួសារសោះនោះ ក៏ត្រូវបង់លុយឲ្យមន្ត្រី ជលផលជាមុនសិន បើមិនដូច្នេះទេ ត្រូវគេចាប់យកទូកម៉ាស៊ីន ហើយពិន័យរហូតរាប់ពាន់ដុល្លារអាមេរិក ។

ទោះជាយ៉ាងណា លោក គឹម សារិទ្ធ ភ្នាក់ងារយើងមិនអាចសុំការបំភ្លឺបាននោះទេ ព្រោះមិនមានលេខទូរស័ព្ទទំនាក់ទំនង
ដោយឡែកតែប្រភពពីប្រជាពលរដ្ឋ នៅតែស្នើសុំយ៉ាងទទូចសុំឲ្យថ្នាក់ដឹកនាំគ្រប់លំដាប់ថ្នាក់ មេត្តាចាត់វិធានការលើរូប
លោក គឹម សារិទ្ធ ព្រោះកន្លងមករូបគាត់ធ្វើឲ្យពលរដ្ឋរងទុកច្រើនណាស់ ។

ប៉ុន្តែដើម្បីបង្ហាញអំពីភាពច្បាស់ការណ៌ គេហទំព័រខ្លាប៉ុស្តិ៍ នឹងព្យាយាមសុំការបំភ្លឺពីថ្នាក់ដឹកនាំជលផលបន្តទៀត ដើម្បី ផ្សាយជូនសង្គមជ្រាប នៅពេលខាងមុខ ៕